BUTUAN CITY – Nanawagan ang environmental group nga BAN Toxics alang sa mas lawom nga pagtuon ug mas halapad nga konsultasyon bahin sa planong Pax Silica Project sa Pilipinas.
Gibutyag ni BAN Toxics Advocacy and Campaign Officer Thony Dizon nga base sa pipila ka mga pagtuon, adunay mga data center project nga wala madayon tungod sa mga problema sa suplay sa tubig, dakong konsumo sa kuryente ug uban pang isyu sa kina-iyahan.
Sumala kang Dizon, importante nga masiguro kung nakalabay ba ang proyekto sa hustong konsultasyon, ilabina kay dako nga luna sa yuta ang gilauman nga gamiton ug mahimong makaapekto kini sa pipila ka mga komunidad.
Bisan pa og giila niya nga adunay posibilidad nga makahatag kini og mga trabaho, kinahanglan usab nga klarong ipasabot ang posibleng epekto niini sa panglawas, kalikopan ug sa mga residente nga mahimong maapektuhan.
