BUTUAN CITY – Gimanduan karon sa Energy Regulatory Commission kon ERC ang Manila Electric Company kon MERALCO nga i-refund ang kinatibuk-ang ₱9.5 bilyon nga sobra nilang nasingil nga bayrunon sa kuryente niadtong tuig 2025, ngadto sa ilang mga konsumidor.
Base sa desisyon sa ERC nga gipetsahan og Hulyo 31, ang refund bugti sa ₱0.3449 matag kilowatt-hour (kWh) nga maoy ikunhod sa bayranon sa mga kostumer sulod sa unom ka bulan.
Ang maong refund ipakita isip lahi nga item sa binuwan nga bill sa kuryente, ug gila-uman nga magsugod kini sa sunod nga billing cycle.
Sigon ni ERC Chairperson ug Chief Executive Officer Francis Saturnino Juan, ipatuman dayon ang refund higayon nga madawat sa Meralco ang opisyal nga desisyon sa komisyon.
Gipasabot sa ERC nga ang refund resulta sa pagtul-id sa mga singil nga gipahamtang sa gitawag nga lapsed period gikan Enero hangtod Disyembre 2025.
Niadtong panahona, nagpadayon ang Meralco sa pagsingil gamit ang daang aprubadong rate samtang naghulat pa sa pag-apruba sa bag-ong rate ubos sa rate reset process.
Dugang pa sa ERC, gipa-apil usab sa kinatibuk-ang refund ang interest tungod sa sobra nga kantidad nga nakolekta sa Meralco sulod sa maong panahon.
