BUTUAN CITY- Gipahibalo sa mga siyentista sa China ang kalampusan sa Bone-02, usa ka bag-ong klase sa bone glue nga makasumpay ug makapaayo sa nabali nga bukog sulod lamang sa duha hangtod tulo ka minuto.
Ang teknolohiya, nga gimugna sa grupo ni Dr. Lin Xianfeng sa Sir Run Run Shaw Hospital sa Zhejiang University, giinspirar sa kusog nga pagkapilit sa talaba bisan sa basa nga palibot.
Sumala sa mga tigdukiduki, bioabsorbable ang Bone-02 ug natural nga matunaw sa lawas human maulian ang bukog, busa dili na kinahanglan ang laing operasyon aron tangtangon ang metal implants. Kapin na sa 150 ka pasyente ang nasulayan sa maong teknolohiya, kansa gilauman nga makapauswag sa pagtambal sa mga bali sa bukog pinaagi sa mas paspas, mas luwas, ug mas dili sakit nga pamaagi.
