BUTUAN CITY – Gipalig-on sa PhilHealth Caraga ug Manuel J. Santos Hospital ang paghatag og specialized healthcare human opisyal nga mipirma sa kontrata alang sa implementasyon sa duha ka bag-ong Philippine Health Insurance Corporation kon PhilHealth Z Benefit Packages.
Ang Manuel J. Santos Hospital mao ang unang ospital sa Craga Region nga nagpatuman sa Peritoneal Dialysis (PD First) ug Physical Medicine, Rehabilitation Services & Assistive Mobility Devices.
Pinaagi sa maong kasabutan, mas mapadali ang pag-angkon sa mga kwalipikadong pasyente sa mga benepisyo alang sa dialysis, rehabilitasyon, ug assistive mobility devices pinaagi sa PhilHealth.
Gilauman nga kini makatabang sa pagpauswag sa kalidad sa pag-atiman sa panglawas ug pagpakunhod sa gasto sa mga benepisyaryo.
Ang maong inisyatiba nagpakita sa padayong paningkamot nga mapalapad ang access sa dekalidad nga serbisyong medikal alang sa mga Caraganons, pinaagi sa lig-on nga pakigtambayayong sa PhilHealth.
