BUTUAN CITY – Gikumpirma sa lokal nga kagamhanan sa Manila ang tulo ka bag-ong kaso sa COVID-19 base sa pinakabag-ong report sa ilang Water and Food-Borne Diseases, Influenza-Like Illnesses, Leptospirosis, ug Dengue kon WILD monitoring.
Tungod niini, nisaka na sa 60 ang kinatibuk-ang kumpirmadong kaso sa COVID-19 nga natala sa siyudad gikan Enero 1 hangtod karong bulana.
Gawas sa COVID-19, nakatala usab ang city government og tulo ka bag-ong kaso sa dengue, nga nagdala sa kinatibuk-ang ihap niini ngadto sa 1,961 ka mga kaso karong tuiga.
Walay naitalang bag-ong kaso sa uban pang W.I.L.D. diseases nga gi-monitor matag adlaw sa lokal nga kagamhanan. Gipahimangno pag-usab sa Manila Health Department (MHD) ang publiko nga magpadayon sa pag-amping batok sa mga W.I.L.D. diseases, ilabi na karong panahon sa ting-ulan.
