BUTUAN CITY- Ming-abot na sa kapin P12.50 million ang kantidad sa kadaot sa sektor sa agrikultura tungod sa pagkuso-kuso ni bagyong Inday.
Tungod niini, sumala sa Department of Agriculture (DA), naapektuhan ang kinatibuk-ang 1,078 ka magsasaka nga adunay 500 ka ektarya sa agricultural areas sa upat ka rehiyon.
Base sa initial assessment sa DA Disaster Risk Reduction and Management Operations Center, natala ang kadaot sa sektor sa agrikultura sa Calabarzon, Mimaropa, Western Visayas ug Negros Island Region.
Nagresulta kini sa pagkawala sa 107 metrikong toneladang produksiyon, nga subject sa validation.
Gilaoman pa ang dugang kadaot ug pagkalugi sa mga apektadong rehiyon samtang nagpadayon ang gihimong assessment ug validation.
Isip tubag sa mga panginahanglan sa mga mag-uuma ug mangingisdang apektado sa habagat ug mi-aging bagyong inday, nagtudlo na ang ahensiya og mga interbensiyon lakip ang mga agricultural inputs, Survival and Recovery Loan Program ug indemnification sa mga apektadong insured farmers.
