BUTUAN CITY – Napresentar sa prosecution panel kaganina ang usa ka witness nga gikan sa National Bureau of Investigation kon NBI sa ikaduhang adlaw sa impeachment trial ni Vice President Sara Duterte nga milungtad og upat og tunga ka oras.
Ang maong presentasyon gi-ablihan pinaagi sa pagbarog ni House Prosecutor Rep. Lorenz Defensor sa kasong Grave Threats adiser mibarog si Private Prosecutor Atty. Amando Virgil Ligutan aron pormal nga tawgon si NBI Agent Calilung ngadto sa witness stand.
Gipasabot ni Ligutan sa korte nga si Calilung usa ka eksperto, maayong pagkabansay, ug eksperyensyado sa digital forensic examination gikan sa Cybercrime Division sa NBI.
Nagsugod ang tensyon sa wala pa makasugod og sulti ang testigo alang sa iyang direktang testimonya human mibarog dayon si Defense Counsel Atty. Carlo Joaquin Narvasa og mihimo og mosyon ang depensa nga i-exclude o dili pabarugon isip testigo si Calilung sa rasong wala matud pa ang ngalan ni Calilung sa orihinal nga impeachment complaint ug sa mga dokumento nga gipadala sa Senado butang nga gibasura ni Presiding Officer Sen. Francis “Chiz” Escudero.
Human niini, napakita sa prosecution ang 2-minute ug 18-second nga video sa pagpanghulga ni Duterte. Gisundan pa sa daghang mga objections ang pagpangutana sa prosecution ngadto sa witness.
Samtang mipalag usab si Senator-judge Pia Cayetano sa pangutana ni Senator-judge Risa Hontiverus ngadto kang Atty. Ligutan nga miresulta matud pa sa paghatag na og konklusyon.
Adiser pa nagsugod ang pagtaral, miabot sa senado si Vice President Sara Duterte dili aron motambong kundi makigpulong ngadto sa iyang mga defense panel. Mihatag usab kini og hamubo nga reaksiyon apan wala na midawat og pangutanan tungod kay tambag kini sa iyang mga abogado.
Ugma sa hapon ipadayon ang impeachment trial diin mohimo na pag-cross examine ang depensa ngadto sa witness sa prosecution panel.
