BUTUAN CITY- Gidagsa sa mga fans gikan sa Norway ang Boston aron suportahan ang ilang nasud sa unang pag-apil niini sa World Cup sulod sa 28 ka tuig, ug nakadani sila sa atensyon sa publiko pinaagi sa ilang talagsaong “Viking rowing” performance.
Sa usa ka viral nga video sa South Station, makita ang mga Norwegian supporters nga nagsul-ob og Viking helmets ug nagkupot og mga bandera samtang nagpakaaron-ingnon nga nagsakay og Viking longship pinaagi sa sabayang pagbugsay sa escalator.
Ang maong pasundayag nakapukaw og daghang positibong reaksyon sa social media, bisan pa man nga adunay pipila ka netizens nga nagpahayag og kabalaka sa kaluwasan sa mga bandera ug kapa nga posibleng masangit sa escalator.
Samtang nagpadayon ang kasadya sa World Cup, nadani usab ang mga residente sa Boston sa pag-abot sa mga fans gikan sa Scotland nga nagsaulog sa ilang 1-0 nga kadaugan batok sa Haiti pinaagi sa usa ka malipayong parada ngadto sa Fenway Park.
