BUTUAN CITY – Emosyunal nga nagpagawas sa iyang reaksyon si Lotlot de Leon kalabot sa dugay nang gihulatan sa tanan kalabot sa gibilin nga katigayunan sa ilang inahang si Nora Aunor nga matud pa, gi-solo lang sa iyang manghod nga si Ian de Leon ug wala’y ilang upat nga mga adopted siblings.
Sa usa ka presscon sa iyang gi-apilang pelikula, giklaro ni Lotlot nga nasakitan siya sa mga alegasyon nga sila ug ang iyang mga igsuon nga sila Matet, Kiko ug Ken, naggukod matud pa sa bahando sa ilang namatay na nga inahan. Iyang gi-klaro nga wala siya nagdepende sa iyang ginikanan ug wala siya nangayo og bisan unsang kabilin, apil na sa mga yuta sa ilang inahan sa Bicol.
Dinhi nakahilak si Lotlot sa pagsulti nga wala sila’y nadawat bisan gamay tungod kay ang kabtangan, gipangalan man kang Ian isip bugtong biological child.
Iyang gihisgutan usab ang foundation nga gihimo aron ipadayon ang legacy ni Nora, diin giimbitar niya si Ian nga moapil pero kini mi-decline.
Nasakitan siya nga giingon ni Ian nga wala siya’y ipagawas nga kwarta alang sa foundation.
Gidepensahan ni Lotlot ang iyang mga igsuon nga sila Matet, Kiko, ug Ken batok sa mga akusasyon, ug giingon nga wala gyud sila nangayo o nangilog tungod kay alang kaniya, igo na nga natawag niyang “mommy” si Nora ug napadako sila sa usa ka Superstar dayong butyag nga kang Ian na ang tanan niyang gustong makuha.
