BUTUAN CITY- Nagpatuman ang Butuan City Water District og Emergency Water Service Interruption sugod kagahapon sa may ala-1:00 sa hapon, Hunyo 17 tungod sa dinaliang pag-ayo sa 900-milimetro nga transmission line nga adunay dakong tagas duol sa Taguibo Elementary School. Sumala sa BCWD, ang kadaot sa linya nalambigit sa mga linog nga nahitabo niadtong Hunyo 8 ug 9, hinungdan sa paguba sa maong linya ug nagkinahanglan og emerhensiyang pag-ayo.
Ang tibuok service area sa distrito maapektuhan sa ubos nga presyon sa tubig o posible nga walay agas hangtod sa hingpit nga pagbalik sa serbisyo. Gilauman usab nga inanay’ng mabalik ang suplay sa tubig sugod karung adlawa Hunyo 18 sa nagkadaiyang mga barangay hangtod Hunyo 20. Giawhag sa BCWD ang mga konsumidor nga magtipig og igo nga tubig alang sa ilang panginahanglanon ug magmatngon sa paggamit niini samtang nagpadayon ang operasyon sa pag-ayo. Nangayo usab og dispensa ang ahensya sa tanang apektadong residente ug nangayo og pagsabot samtang gihimo ang mga lakang aron dali ug episyenteng masulbad ang problema.
