BUTUAN CITY- Nagkahiusa ang Department of Health (DOH), Commission on Higher Education (CHED), Professional Regulation Commission (PRC), ug United Nations Population Fund (UNFPA) sa pagpatuman sa bag-ong gipalapad nga Midwifery Competency Framework aron mapalambo ang kahimtang ug pagbansay sa mga midwife sa Pilipinas isip importante nga haligi sa pagpalig-on sa Universal Health Care kon UHC.
Ang inisyatiba nagtubag sa dugay nang kakulang sa mga midwife ug sa karaan nga mga sumbanan sa ilang propesyon, ilabi na nga ubos sa pito ka midwife ang anaa sa matag 10,000 ka populasyon sumala sa State of Asia’s Midwifery Report 2024. Pinaagi sa bag-ong framework, gipalapdan ang papel sa mga midwife aron malakip ang serbisyo sa family planning, suporta sa mga biktima sa gender-based violence, ug paggamit sa digital health services.
Sumala sa mga opisyal, kini maghatag og klarong dalan alang sa career development ug makatabang sa pagmintinar sa mga kwalipikadong midwife, samtang gisiguro ang mas taas nga kalidad sa pag-atiman sa kahimsog sa mga inahan, bag-ong natawo nga mga bata, ug komunidad sa tibuok nasod.
