BUTUAN CITY- Nagpinirmahayg og kasabutan ang Commission on Higher Education kon CHED ug Department of Health kon DOH aron palig-onon ang pagpalambo sa healthcare workforce sa nasud isip kabahin sa paningkamot sa gobyerno nga mapalapdan ang akses sa dekalidad nga serbisyong panglawas ubos sa Universal Health Care Act.
Ang Memorandum of Understanding kon MOU, nga gipangulohan nila ni CHED Chairperson Shirley Agrupis ug DOH Secretary Teodoro Herbosa, nagtumong sa pagpaayo sa kalidad ug kalabutan sa mga programa sa health professions, paglig-on sa workforce planning, ug pagsiguro nga andam ug kwalipikado ang umalabot nga mga health professional sa pagtubag sa nagkadakong panginahanglan sa sektor sa panglawas.
Sumala sa mga opisyal, ang maong kolaborasyon makatabang sa pagpalig-on sa universal healthcare pinaagi sa paghatag og patas ug dekalidad nga serbisyong medikal sa tanang Pilipino ug pag-andam sa mas lig-on ug mas episyenteng healthcare system sa umaabot.
