BUTUAN CITY- Gikompermang patay ang tulo ka seaman sa Indian, kinsa unang gitahon nga nawala, human minghimo og airstrike ang militar sa Estados Unidos sa Gulf of Oman.
Gitarget sa maong pag-atake niadtong Miyerkules ang oil tanker nga MT Settebello nga adunay flag sa Palau.
Sumala sa US military, gi-atake ang barko tungod sa kapakyasan niining mosunod sa mga direktiba sa American forces, nunot na usab sa mga alegasyong nagdala kini og mga lana gikan sa Iran.
Adunay kinatbuk-ang 24 ka tripulanteng Indian ang lulan sa oil tanker dihang nahitabo ang insidente, kung asa luwas usab nga na-rescue ang 21 sa mga niini.
Gitawag usab ni Indian Shipping Minister Sarbananda Sonowal ang trahedya isip “deeply unfortunate.” Gisiguro usab niini nga kasamtangan nang giplastar ang repatriation o pagpa-uli sa mga patay’ng lawas sa mga Indian nationals.
Tungod sa insidente, opisyal nang gipatawag sa gobyerno sa India ang deputy head sa US mission sa Delhi aron magpadala og protesta. Kini ang ika-duhang barko nga adunay mga tripulanteng Indian nga gi-atake sa puwersa sa US sulod lang sa karung simanaha.
