BUTUAN CITY- Nagpabilin nga usa ka dakong kabalaka sa sektor sa panglawas ang maternal mortality o pagkamatay sa mga inahan panahon sa pagmabdos, pagpanganak ug pipila ka adlaw human sa pagpanganak, bisan pa sa pagkunhod sa mga kaso sa miaging mga tuig.
Sumala sa datos sa Philippine Statistics Authority, mikunhod ang maternal mortality ratio gikan sa 151 ka pagkamatay matag 100,000 ka pagpanganak niadtong 2020 ngadto sa 119 niadtong 2024, apan mas taas gihapon kini kaysa sa target sa Sustainable Development Goals nga 70 ka pagkamatay matag 100,000 ka pagpanganak.
Aron madasig ang mas daghang mabdos nga magpa-checkup ug manganak sa mga ospital ug akreditadong pasilidad panglawas, gipalapdan sa Philippine Health Insurance Corporation kon PhilHealth ang maternity benefit packages niini, diin ang coverage alang sa hospital delivery misaka gikan P9,750 ngadto sa P29,000, samtang ang benepisyo alang sa Caesarean section misaka gikan P37,050 ngadto sa P58,000.
Sumala ni Mae Villa, ang dugang benepisyo gitumong sa pagtabang sa mga pamilya nga naglisod sa gasto sa pagpanganak ug aron masiguro nga ang mga inahan ug ilang mga anak makadawat sa hustong pag-atiman sa panglawas. Gipasiugda usab sa mga eksperto nga ang regular nga prenatal consultation ug sayong pagpakonsulta sa doktor maoy usa sa labing epektibong pamaagi aron malikayan ang mga komplikasyon ug mapanalipdan ang kahimsog sa inahan ug sa bata.
