BUTUAN CITY – Gibasura sa Sandiganbayan Seventh Division ang hangyu ni kanhe House Speaker at Leyte 1st District Representative Martin Romualdez nga wad on ang precautionary hold departure order (PHDO) nga gipahamtang batuk kanya.
Base sa desisyong dunay petsang Hunyo 1 ug gisulat ni Associate Justice Lorifel Pahimna, napakyas si Romualdez nga magpakita og igo nga basehan aron tugutan siyang mobiyahe sa ubang nasud alang sa matud pa medical check-up.
Sumala sa graft court, wala nakasubmite ang kongresista sa mga kinahanglang dokumento, lakip ang medical abstract ug uban pang medical records, aron suportahan ang iyang hangyu.
Sigon usab sa korte nga napakyas si Romualdez nga pamatud-an nga urgent ang iyang medical consultation ug treatment sa ubang nasud.
Tungod niini, wala nakita sa Sandiganbayan ang igong rason aron bakwion ang nagtunhay nga precautionary hold departure order batuk kaniya.
Sa maong desisyon, gipamugos usab sa korte nga makonsidera pa gihapong flight risk si Romualdez samtang gidungog ang kasong iyang giatubang.
Sumala sa mga rekord sa kaso, gitudlong nag-unang utok o mastermind si Romualdez sa matud pa anomaluso sa kontrobersyal nga flood control projects nga kasamtangang giimbestigahan sa mga awtoridad.
Padayon usab nga gipaabot ang mahimong sunod nga lakang sa kampo ni Romualdez mahitungod sa nahimong desisyon sa Sandiganbayan.
