BUTUAN CITY – Gikumpirma ni Department of Justice Sec Fredderick Vida nga dili sila maggahin og kwarta isip patong sa ulo niadtong mga indibidwal nga makatudlo sa nahimutangan ni Senador Ronald ‘Bato’ de la Rosa.
Sa pagkakaron, duna na matud pa sila’y gikuptang impormasyo nga makatabang aron makita sa mga hingtungdang ahensya ang nahimutangan niini.
Nanawagan kini sa senador nga isip kanhi hepe sa kapulisan ug isip senador, mas maayonmg makigtinabangay kini ug sundon ang proseso sa balaud dayong butyag nga dili pagsurender ug pag-atubang niini sa iyang warrant, duna’y epekto sa panglantaw ug kalibog sa publiko.
Tungod niini, nanawagan siya sa senador nga atubangon ang naghulat kaniyang ICC arrest warrant.
Samtang plano usab sa kalihim nga sulatan si Atty Jimmy Bondoc – usa sa mga abogado sa senador human niini gipadayag nga duna siya’y kasayuran sa lokasyon karon sa magbabalaud.
Tumong sa sulat nga hangyuon kining makig-alayon sa proseso sa balaud ingon man pagpatuman sa arrest warrant.
Giklaro usab sa opisyal nga andam siyang imando pag-usab ngadto sa Philippine National Police kon PNP ug sa National Bureau of Investigation kon NBI ang pagpatuman sa bisan unsang arrest warrant nga gikan sa International Criminal Court kon ICC.
Tungod niini masaligon usab siya nga andam ang maong mga ahensya nga ilang tumanon kung adunay dugang nga arrest warrant nga ipagawas sa International Tribunal.
