BUTUAN CITY- Giklaro sa Department of Health (DOH) nga walay mga kaso sa Ebola sa Pilipinas.
Sumala ni DOH spokesperson Undersecretary Albert Domingo, klaro nga wala pay kaso sa nasud hinungdan nga wala matud pay rason aron mag-panic ang mga Pilipino taliwa sa natahong outbreak sa sakit sa Democratic Republic of the Congo.
Sa pagkakaron, ubos matud pa ang rason aron maka-angkon og kaso sa nasud tungod sa layo ra kita gikan sa West Africa kung asa natala ang ebola outbreak.
Gipadayag usab sa DOH official nga walay girekomenda ang World Health Organization (WHO) nga unsa mang travel ban mao nga dili usab kini ipatuman sa nasud.
Bisan paman, magpatuman matud pa ang Bureau of Quarantine og hugot nga screening sa mga biyaherong gikan sa Democratic Republic of the Congo ug Uganda.
Kahinumdumang una nang gideklara sa WHO ang Ebola outbreak sa nasangpit nga mga nasud isip public health emergency of international concern.
Samtang gitaho ni USec. Domingo nga gitun-an na sa mga eksperto sa WHO ang posibleng tambal batok sa Bundibugyo virus nga hinungdan sa ebola outbreak sama sa remdesivir, nga gigamit kani-adto isip tambal batok sa COVID-19.
Gipahimangnuan usab sa DOH official ang publiko nga pakusgan ang ilang immunity aron dili mataptam sa maong sakit, nga na-transmit pinaagi sa body fluids.
