BUTUAN CITY – Usa ka babayeng powerlifter sa Mexico ang nakatala og Guinness World Record human niya gi-alsa ang weights nga 75.35 kilos gamit lang ang iyang gisintipid nga buhok.
Makabilib ang kakusgan nga gipakita ni Diana Elizabeth Batres Hermosillo, usa ka beteranong circus performer, human niya makuha ang Guinness World Record para sa heaviest weight lifted with the hair sa mga babaye.
Sa atubangan sa mga manan-away sa Le Paz Theatre niadtong Pebrero 28, malampuson nga na-alsa ni Diana ang weights o puthaw nga 75.35 kilos o susama kabug-at sa usa ka tawo gamit ang iyang duha ka sinintipid nga buhok.
Gipildi niya ang kanhe record ni Asha Rani gikan sa India nga natala niadtong 2014.
Unom ka buwan ang gigahin ni Diana sa pagbansay aron makaya sa iyang buhok, liog og likod ang bug-at nga pressure.
Sa iyang world record attempt, gi-alsa niya ang mga weighted plates sulod sa 14 segundos samtang gisundan pa kini sa usa ka stunt diin gisab-it niya ang iyang kaugalingon gamit lang ang iya gihapong buhok.
