BUTUAN CITY- Nabaligya sa kapin P22 milyon ang usa ka talagsaong vintage denim jacket nga gikan pa sa panahon sa World War II, human kini mapalit sa kantidad nga 55 million Japanese yen, usa ka bag-ong rekord alang sa second-hand nga jacket nga dili memorabilia.
Ang maong jacket anaa sa “mint condition” ug gihimo sa panahon sa gubat diin adunay kakulang sa materyales, hinungdan nga limitado ang produksyon ug adunay mga talagsaong disenyo.
Usa sa pinakabantogan nga bahin niini mao ang “split-back” design, diin duha ka ritaso sa tela ang gigamit sa likod sa jacket, usa ka teknik nga nagpakita sa pagtipid sa tela atol sa gubat.
Gawas niini, makita usab ang ubang detalye sama sa donut buttons ug lain-laing klase sa pocket fabric, kansa nagdugang sa historical ug artistic value sa maong jacket.
Tungod sa iyang kahimtang, kasaysayan, ug talagsaong disenyo, ang jacket giila karon isip usa ka bililhong koleksiyon alang sa mga vintage denim collectors sa tibuok kalibutan.
