BUTUAN CITY – Usa ang Pilipinas sa mga nasud sa Association of Southeast Asian Nations kon ASEAN nga labing ma-apektuhan sa generative artificial intelligence kon GenAI, uban sa teknolohiya nga gila-umang mag-usab sa klase sa mga trabaho ug hingpit nga mopuli niini.
Sumala sa analysis sa mga espesyalista sa trabaho sa International Labour Organization kon ILO, 21% hangtod 28% sa mga trabaho sa pipila ka mga nasod sa ASEAN, ang mahimong ma-apektuhan sa GenAI.
Ang Pilipinas anaa sa taas nga bahin sa maong porsyento tungod sa ekonomiya niini nga naka-focus sa serbisyo ug nag-agad sa information technology ug business process management.
Gamay nga bahin sa mga trabaho sa Pilipinas, Indonesia ug Thailand — mga 3% hangtod 4% — ang adunay mas taas nga risgo nga mapulihan.
“Ang kadaghanan sa mga trabaho maapektuhan lamang sa partial task automation, buot ipasabot nga mausab ang paagi sa trabaho imbes nga mawala kini kondiin ang mga clerical o office works mao ang labing maapektuhan.
Sa Pilipinas, 93.7% sa clerical jobs ang maapektuhan, ug 37.8% niini ang nasakop sa pinakataas nga risgo nga kategoriya. Lakip niini ang mga routine works sa opisina sama sa data entry ug pagdumala sa mga rekord.
