BUTUAN CITY- Nagpadayag ang defense team ni Vice President Sara Duterte nga wala na nila gikatingala ang nahimong findings sa House Committee on Justice nga adunay probable cause batok niini, base sa direksyon sa mga miaging hearing.
Sumala sa ilang pamahayag, nagpabilin silang nagtuo nga ang proseso sa komite minglihis sa disenyo sa Konstitusyon. Imbis nga magpabilin sa mga verified complaints ug mga kalakip niini, gipalapad matud pa ang proseso sa mga hisgutanang kinahanglan tuki-on sa usa ka full trial.
Kaganiha mingboto ang House Committee on Justice nga adunay probable cause sa impeachment complaint batok kang VP Duterte. Ang mga alegasyon gilangkoban sa misuse sa confidential funds, unexplained wealth, ug gi-ingong death threats batok sa Presidente, First Lady, ug kanhi House Speaker. Sa mga unang hearing, gipresenta sa Anti-Money Laundering Council kon AMLC ang taho nga P6.7 bilyong transaksyon kansa wala matud pa mingha-om sa Statement of Assets, Liabilities, and Net Worth kon SALNs sa mag-ti-ayong Atty. Manases Carpio ug Vice President Sara Duterte-Carpio.
Ang findings sa probable cause magdala sa impeachment case sa plenaryo sa Kamara, ug kung aprubahan, ibalhin kini sa Senado alang sa impeachment trial.
