BUTUAN CITY – Mag-gahin ang United Kingdom og hangtud sag 660 milyones British pounds o bugti sa kapin 892 milyones dolyares sa France sulod sa tulo ka tuig isip kabahin sa bag-ong kasabutan aron pug-ngan ang pagtaas sa illegal migrant crossings sa English Channel.
Sumala sa mga opisyal, ang pondo gamitin aron pakusgon ang seguridad sa baybayon sa northern France diin nakatala og liboang iligal nga pagtabok sa mga migrante padulong sa UK.
Base sa datos, miabot sa kapin 41-mil katawo ang mitabok sa Channel niadtong 2025, nga halos bugti sa record niadtong 2022.
Sa ilalom sa kasabutan, 500 milyones ka British pounds ang igahin para sa pagpakusog sa enforcement operations lakip ang pag-deploy sa halos 1,100 ka personahe sa kapulisan, intelligence operatives, ug military personnel sa mga coastal areas.
Dugang pa niini, ipagawas lang ang 160 milyones pounds kung mapamatud-ang epektibo ang mga bag-ong lakang sa pagbawas sa crossings. Ugaling dili magmalampuson, mamahimong ihunong ang nasangpit nga pondo human ang usa ka tuig.
Lakip sa bag-ong plano ang pagmugna og 50-katawong riot police unit, mas gipalapad nga intelligence ug judicial teams, ug dugang maritime patrols.
Mogamit usab og drones, duha ka helicopter, ug upgraded camera systems ang duha ka nasud aron mas hugot nga pagbantay sa kadagatan.
