BUTUAN CITY- Gipresentar sa House Committee on Justice ang mga alegasyon ni kanhi senador Antonio Trillanes IV nga daw nakadawat ang pamilya ni kanhi President Rodrigo Duterte og kinatibuk-ang P181.6 million nga gi-ingong naggikan sa usa ka drug lord nga nailang si Sammy Uy.
Sa gisumpaang salay-say niini, sigon ni Trillanes nga ang mga tsekeng na-encash napadulong sa mga miyembro sa pamilyang Duterte, lakip na niini si Vice President Sara Duterte, kinsa nakadawat og P22.3 million. Lakip usab sa listahan ang uban pang kapamilya nga adunay managlahing kantidad sa transaksyon.
Pag-insistar pa ni Trillanes nga ang mga niini posibleng maila nga “impeachable offenses” sama sa betrayal of public trust, graft and corruption, ug uban pang mga bug-at nga kaso. Gilambigit usab niini si Sammy Uy sa mas halapad nga network nga gi-ingong konektado sa mga kanhi isyu sa droga, lakip ang mga personalidad nga sila kanhi economic adviser Michael Yang ug mga isyung nalambigit sa ilegal nga droga ug Philippine Offshore Gaming Operator kon POGO operations.
Gisoportahan usab sa mga alegasyon ang nahimong testimonya ni kanhi pulis SPO4 Arturo Lascañas ang mga relasyon sa mga personalidad sa operasyon sa shabu laboratories sa Davao City.
Samtang, gikomperma ni Atty. Romel Buenaventura sa Anti-Money Laundering Council kon AMLC nga 18 ka transaksyon nga nakalatid sa affidavit ni Trillanes ang mingkonektar sa ilang database, lakip ang pipila ka transaksyong adunay kalabotan kay Sammy Uy.
Sumala ni House Committee on Justice Chairperson ug Batangas 2nd District Representative Gerville Luistro, nga ang mga nadiskobrehan parte sa nagpadayon nga pagsusi sa komite sa mga alegasyon ubos sa impeachment proceedings batok kang Vice President Sara Duterte.
