BUTUAN CITY- Gipasidan-an ang publiko subay sa pagsaulog sa National Hemophilia Awareness Month karung bulana Abril, nga ang hemophilia dili lang simple nga lagom o bun-og ug samad, kundili usa ka seryosong kondisyon diin ang dugo dili dali maporma.
Ang mga timailhan niini naglakip sa grabe nga pagdugo bisan sa gamay nga samad, kanunay o dili masabtan nga bun-og, pagdugo sa ilong ug ngala-ngala, abnormal nga pagdugo human ma-injekan, ug presensya sa dugo sa ihi o paglibang.
Gipasiugda sa mga health experts nga ang sayo nga pagtuki ug medikal nga pagsusi mao ang yawe aron malikayan ang grabe nga komplikasyon ug mapalig-on ang pag-atiman sa mga pasyente nga apektado sa hemophilia.
Ang maong kampanya nagtumong sa paghatag og bag-ong kahibalo ug paglaum alang sa mas lig-on nga panglawas sa komunidad.
