BUTUAN CITY- Nagpagawas ang Commission on Audit (COA) og bag-ong notice of disallowance (ND) nga adunay kalabotan sa confidential funds sa Office of the Vice President (OVP), kung asa ming-abot kini sa P300 million, sumala sa House Committee on Public Accounts Chairperson Terry Ridon niadtong Domingo.
Sumala ni Ridon, ang bag-ong ND lahi sa unang desisyon sa COA nga mingkomperma sa disallowance nga P73 million confidential funds nga gigamit matud pa sa OVP gikan Disyembre 21 hangtud 31, 2022. Pagklaro pa sa Kongresista nga ang unang P73 million nga disallowance adunay final ruling na ug posibleng mo-abot sa Korte Suprema, samtang ang bag-ong P300 million ubos pa sa audit review ug dili pa final.
Sigon pa ni Ridon, gipakita sa ND ang posibleng mas dako pa nga nga isyu sa paggamit sa confidential funds sa OVP, kansa gikataho nga padayong giimbestigahan sa mga awtoridad. Samtang, padayon ang hearing sa House justice panel kalabot sa impeachment complaints batok kang Vice President Sara Duterte, nga gilangkoban sa mga alegasyong sayop sa paggamit sa P612.5 million confidential funds, pagpanghulga sa Presidente ug pamilya niini, ug ang gi-ingong unexplained wealth.
Kahinumdumang wala mingtambong si Vice President Sara sa mga ming-aging hearing niadtong Marso 25 ug Abril 14, samtang nagpadayon ang imbestigasyon sa nagkandaiyang ahensya, lakip ang National Bureau of Investigation (NBI), kansa mingbutyag nga adunay irregularidad usab matud pa sa pipila ka signature sa mga dokumentong adunay kalabotan sa confidential funds.
