BUTUAN CITY- Gipadayag ni Interior Secretary Jonvic Remulla, nga posibleng mo-abot pa sa isa hangtud tulo ka semana adiser makabalik sa Pilipinas si kanhi Ako Bicol-Party List Rep. Elizaldy “Zaldy” Co gikan sa nasud sa Czech Republic.
Si Co nasikop sa Prague human masikop tungod matud pa sa walay husto nga travel documents samtang mingsuway nga motabok padulong sa Germany. Sumala sa taho, gipabalik kini sa Czech authorities ug kasamtangang giplastar ang proseso sa iyang deportation. Sigon pa ni Remulla nga nakadepende ang bilis sa iyang pag-uli sa koordinasyon sa Department of Foreign Affairs ug mga awtoridad sa Czech Republic. Adunay mga komplikasyon usab matud pa tungod kanselado na ang Philippine passport niini.
Sumala sa mga opisyal, naka-abot na usab si Co sa daghang nasud sa Europa adiser kini na-aresto, ug posibleng mo-agi pa kini sa France adiser maka-abot sa Czech Republic. Si Co nag-atubang sa mga kasong graft ug malversation kalabot sa irregularidad sa P289.5 million flood control project sa Oriental Mindoro. Gi-ila usab kini isip “fugitive from justice” sa Sandiganbayan human mingbalibad nga mobalik sa Pilipinas aron atubangon ang mga kaso.
Ugaling maka-uli na kini dinhi sa nasud, dalhon si Co sa Sandiganbayan alang sa arraignment ug posibleng ipreso sa Camp Crame samtang dunggong ang iyang kaso. Samtang sigon sa Malacañang nga andam si President Ferdinand Marcos Jr. sa bisan unsang mahimong pamahayag ni Co ug gipasiugda nga kinanglang manubag ang mga nalambigit sa flood control corruption scandal.
