BUTUAN CITY- Gi-awhag ni Manila 6th District Rep. Benny Abante si Vice President Sara Duterte nga tumestigo sa Kamara de Representantes ‘under oath’ o motestigo nga nakapanumpa. Kini aron matubag sa Bise Presidente ang tanang mga alegasyon batok niini, tungod ang House Justice Committee matud pa ang husto nga forum aron kontrahon ang maong alegasyon.
Pag-insistar ni Abante, dili tumong sa komite nga i-convict ang Bise Presidente o i-plead guilty, kundi gusto lang matud pa nga masuta ang kamatuoran luyo sa mga alegasyong gibuno batok kaniya. Gibalikan ni Abante ang unang pamahayag ni VP Sara nga tubagon niini ang mga alegasyon sa ‘hustong forum.’ Mingbwelta ang magbabalaod, kini matud pa ang higayon ug husto nga forum aron tubagon ni VP Sara ang mga alegasyon ug komprontahon ang mga nag-akusar kaniya sama ni Ramil Madriaga, ang nagpailang kanhi niining bagman.
Pagsiguro sa magbabalaod, nga paminawon nila ang tanang ipangsulti ni VP Sara ug hatagan usab og higayon nga ipresentar ang iyang bahin. Mas makatabang usab matud pa kini aron makadesisyon ang mga miyembro sa justice panel sa pagsuta kung adunay probable cause sa mga reklamo.
