BUTUAN CITY- Gitaho sa Department of Migrant Workers (DMW) nga daghang overseas Filipino workers (OFWs) ang nawad-an og trabaho tungod sa giyera sa Middle East.
Sa usa ka press briefing kagahapon Biyernes, Abril 17, gikumperma ni DMW Undersecretary Jainal Rasul Jr. nga pipila sa mga OFW permanenteng nawad-an og trabaho samtang adunay uban temporaryong nahunong ang trabaho. Tungod niini, minghatag ang ahensiya og tabang sa mga apektadong overseas workers ug gihimong mas simple ang pamaagi sa aplikasyon aron makakuha og tabang pinansiyal nga nagkantidad og $200 o bugti sa ₱12,100, nga naggikan sa AKSYON Fund sa ahensiya.
Aron maka-avail sa maong cash aid, kinahanglan lang nga magsubmit ang mga apektadong OFWs sa ilang request for assistance form, kopiya sa pasaporte, pamatuod sa overseas employment sama sa kontrata, visa, labor card ingun man ang pamatuod nga nawad-an og trabaho o work disruption sama sa certification gikan sa employer, payslip, notice of termination, visa cancellation kung naa, self declaration nga apektadong OFWs, certification sa Filipino community, ug uban pa.
Samtang gitaho usab ni DMW Secretary Hans Leo Cacdac nga ming-abot na sa kinatibuk-ang 6,706 ang na-repatriate kung asa 5,023 niini mga OFW samtang 1,343 dependents, aduna usab 340 ka tourist ug uban overseas Filipinos.
Pinakadakong ihap sa mga na-repatriate naggikan sa Dubai, gisundan sa arrivals gikan sa Kuwait, Abu Dhabi, Qatar, Bahrain, Riyadh, Al Khobar, Israel, Jeddah ug Oman. Gawas niini, aduna pay OFW gikan sa Middle East ang gilaomang mo-abot sa nasud karung adlawa ug sa sunod simana.
