BUTUAN CITY- Dili mo-ubos sa unom ka tawo ang namatay ug 19 ang angol sa serye sa Israeli airstrikes sa habagatang Lebanon sukad niadtong Domingo sa gabii ngadto na sa kagahapon Lunes sa buntag.
Sa Bazourieh, siyam ka airstrikes ang gitaho hangtod sa alas 5 sa buntag kansa nakapatay ug usa ka tawo ug naka-angol ug laeng 18, samtang nagpadayon ang search-and-rescue operations.
Sa Nabatieh al-Fawqa, usa ka batan-on ang namatay sa airstrike, ug laing usa ang patay sa Sir al-Gharbiyeh, samtang duha pa ang napatay sa Shoukine. Ang Hezbollah mitubag pinaagi sa drone attacks ug rocket barrages batok sa Israeli forces, lakip na sa Kiryat Shmona barracks, Mays al-Jabal, ug Tahrir Triangle. Ang krisis nagpadayon sa pagtaas sa tensiyon sa utlanan sa Lebanon ug Israel.
