BUTUAN CITY- Lauman nga mas mapagaan pa ang palas-anong pinansyal sa mga Pilipinong adunay grbe nga sakit human pormal nga gipagawas sa Bureau of Internal Revenue (BIR) ang pinakabag-ong listahan sa mga tambal nga dili na pahamtangan og Value-Added Tax o VAT.
Pinaagi sa Revenue Memorandum Circular (RMC) No. 27-2026 nga gi-anunsyo niadtong Abril 8, 2026, gideklara sa bureau nga VAT-exempt ang anaa sa 2,263 ka mga tamabal kansa una nang gi-aprobahan ug gi-indorso sa Food and Drug Administration (FDA) sa Department of Health (DOH).
Base sa breakdown sa ahensya, ang pinakadakong parte sa listahan nakagahin alang sa pasyente nga adunay kanser nga umabot sa 702 ka klase sa tambal. Gisundan kini sa 535 ka tambal alang sa hypertension; 327 alang sa diabetes; 300 alang sa mental illness; 171 alang sa taas og cholesterol; 152 alang sa sakit sa bato; ug 76 alang sa tuberculosis.
Ang maong tax exemption gipatuman sabay sa mga probisyong nakalatid sa Republic Act No. 10963 o ang TRAIN Law, ug Republic Act No. 11534 o ang CREATE Act. Sumala ni BIR Commissioner Charlito Martin R. Mendoza, nga kini parte sa mandato sa panggamhanan nga ubsan ang presyo sa= medikasyon sa nasud.
Suportado usab sa Department of Finance (DOF), sa pagpanguna ni Finance Secretary Frederick D. Go, ang pagpatuman niini. Ang inisyatibo direktang tubag sa mando ni President Ferdinand R. Marcos Jr. nga himuong mas accessible ug abot-kaya ang serbisyong medikal alang tanang mga Pilipino.
Giklaro usab sa BIR nga ubos sa RMC No. 27-2026 ang bagong listahang awtomatikong mopuli ug kanselahon ang nangaging mga sirkular nga gi-isyu mahitungod sa maong hilisgutan.
