BUTUAN CITY- Lauman ang unang rollback sa presyo sa diesel sulod sa kapin tulo ka bulan o sukad pa niadtong Disyembre 30, 2025, human sa sunod-sunod nga pagsaka tungod sa krisis sa Middle East, diin gibanabana nga mokunhod kini og P2.50 hangtod P3.50 matag litro sa sunod semana samtang ang gasolina posibleng magpabilin o mokunhod og P1 matag litro.
Ang paglihok sa presyo gibase sa trading sa Mean of Platts Singapore (MOPS) diin nagpakita og pagluya tungod sa temporaryong ceasefire tali sa U.S. ug Iran nga nag-abli pag-usab sa Strait of Hormuz.
Bisan pa, gibutyag sa mga eksperto nga magpabilin gihapon nga taas ang presyo tungod sa kadaot sa energy infrastructure ug padayon nga pagsaka sa gasto, diin asa mingkabat na sa taas nga lebel ang presyo sa kerosene ug diesel nga nakaabot og P170 matag litro ug ang gasolina dul-an sa P120.
Sa laing bahin, gisugo ni Philippine National Police Chief Gen. Jose Melencio Nartatez Jr. ang imbestigasyon sa oil pilferage nga naglakip sa milyones pisos nga ilegal nga operasyon sa San Pablo, Laguna ug Navotas, diin unom ka suspek ang nadakpan ug kapin 65,000 ka litro sa diesel ang nakumpiska.
Gipasiugda usab sa kapulisan nga magpadayon ang ilang monitoring aron masuta kon kini konektado sa mas lapad nga network sa ilegal nga fuel operations.
