BUTUAN CITY – Giklaro sa Department of Health (DOH) nga walay basehan ang nagkatag nga balita mahitungod sa emergency lockdown sa nasud tungod sa giingong bag-ong COVID-19 variant nga gitawag og “Cicada.”
Giawhag sa ahensya ang publiko nga dili magpakaylap og fake news ug mosalig lamang sa opisyal nga impormasyon.
Walay natalang kaso sa nasud nga hinungdan sa Cicada strain (BA.3.2), nga unang nadiskobrehan sa South Africa niadtong Nobyembre 2024 ug kabahin sa COVID-19 Omicron lineage, sumala sa World Health Organization.
Sa pagkakaron, natala na ang variant sa 23 ka nasud ug giapil kini sa kategorya sa COVID variant nga “under monitoring.”
Sumala pa ni DOH spokesperson Albert Domingo, samtang walay pahimangno gikan sa WHO ug uban pang international health bodies, wala’y angay kabalak-an.
Dugang pa sa DOH, mas naka-focus karon ang ahensya sa mga sakit nga may kalabutan sa init ug uga nga panahon, ingon man sa contingency planning sa nasudnong health system samtang nagpadayon ang kahimtang sa national energy emergency.
