BUTUAN CITY – Si Pope Leo XIV ang nahimong ikaduhang Santo Papa nga personal nga nagdala sa krus sa tibuok Via Crucis atol sa Good Friday didto sa Colosseum.
Uban sa gibana-banang 30-mil ka mga magtutuo ug milyones pa sa tibuok kalibutan, gipangunahan ni Pope Leo ang paglakaw sa Way of the Cross taliwala sa kahayag sa mga kandila sa karaang Roman amphitheatre, diin daghang unang Kristiyano ang nahimong martir.
Ang Colosseum, nga gisugdan ni Emperor Vespasian ug nahuman ni Emperor Titus niadtong 80 AD, mao ang pinakadakong elliptical amphitheatre sa karaang panahon ug sa ulahi nahimong usa ka balaang lugar alang sa simbahan.
Matag tuig, magtapok ang Papa ug ang mga magtutuo sa Rome didto sa Colosseum aron buhaton ang espiritwal nga paglakaw sa 14 ka Stations of the Cross, nga naghulagway sa kamatayon ni Hesus.
Si Pope Leo XIV misunod sa tunob ni Pope John Paul II, nga nagdala usab sa krus sa tibuok Via Crucis gikan sa 1980 hangtod 1994.
