BUTUAN CITY- Hugot ug organisadong gipangandaman na ang PANAAD 2026 nga ipahigayon karong Abril 3, alas 4:00 sa kaadlawon, human sa gihimong komprehensibong site visit nila Congressman Jose “Joboy” Aquino II ug Councilor TG Salcedo uban sa kapulisan, City Government, Red Cross, 29th IB Philippine Army, ug mga opisyal sa barangay sa Sitio Mahayahay, Brgy. Anticala karong adlawa, diin gisusi ug gisiguro sa team ang kahimtang sa dalan padulong sa venue, kalig-on sa seguridad, ug kahanduman sa tanang gikinahanglan nga pasilidad aron masiguro ang kaluwasan ug kahapsay sa pag-apil sa mga deboto.
Samtang, gipakusgan usab ang inter-agency coordination miting nga gipangunahan ni PCOL Restituto Lacano Jr. sa Butuan City Police Office (BCPO) uban sa nagkalain-laing ahensya lakip ang Philippine Army, Bureau of Fire Protection (BFP), Department of the Interior and Local Government (DILG), Philippine Red Cross, City Disaster Risk Reduction and Management Office (CDRRMO), ug barangay officials, nga nagtumong sa mas episyente nga crowd management, traffic control, ug andam nga emergency response operations.
Dugang pa, gipahigayon usab ang laing internal nga koordinasyon sa BCPO uban sa Police Commissioned Officers gikan sa headquarters, Police Stations 1 hangtod 6, ug Butuan City Mobile Force Company aron masiguro ang komprehensibong deployment sa kapulisan, samtang gipasiugda ni PCOL Lacano ang kamahinungdanon sa heightened vigilance, lig-on nga koordinasyon, ug proaktibong aksyon aron mapadayon ang kalinaw ug kahapsay, uban sa garantiya sa BCPO sa komunidad nga ang PANAAD 2026 ipahigayon nga luwas, malinawon, ug malampuson.
