BUTUAN CITY – Wala magdahom ang usa ka pamilya sa Maryland sa Estados Unidos nga mabalik pa kanila ang ilang binuhing iring human kini nahanaw halos ka tuig na ang nakalabay.
Sigon sa mag-inahang Melissa Garci ug Brooke Garci, ilang iring nga si Artemis, nawala gikan sa ilang balay sa Hickory niadtong Septyembre 2021 ug wala na mubalik.
Ila na kining gipangita sa mga balay sa ilang mga silingan ug namilit na usab sila og mga flyers, apan wala gyud silay nakitang tunob ni Artemis.
Sumala usab sa Harford County Humane Society, usa ka babaye ang miduol sa ilang pasilidad niadtong Pebrero uban sa usa ka iring nga iyang nakit-an sa iyang wala pa mahuman nga basement.
Gi-scan sa shelter ang iring gamit ang microchip, ug didto nahibal-an nga siya si Artemis.
Dali kining gi-adto sa mag-inahan ug dihang nakita sila ni Artemis kinsa nakigduwa pa sa laing mga iring, dali kining miduol kanila ug dihang mipa-uli na sila, pagkanaog gayod nila sa sakyanan, kini pa ang nag-una kanila pagsulod sa ilang balayd.
Sigon sa humane society, ang maong reunion usa ka pahinumdom sa kahinungdanon sa pagbutang og microchip sa mga binuhing hayop.
