BUTUAN CITY – Gipamugos sa Bangko Sentral ng Pilipinas (BSP) nga dili hingpit nga makadaot sa ekonomiya sa nasud ang pag-os-os sa kantidad sa piso kontra US dollar, tungod kay nakatabang matud pa kini sa pipila ka mga nag-unang sektor.
Sigon ni BSP Governor Eli Remolona Jr., ang kasamtangang estado sa kwarta nga milansang sa lapas 60 pesos nga marka naghatag og pabor sa current account deficit ug sa sektor sa eksportasyon sa Pilipinas.
Mahinumdumang natala ang all-time low nga P60.30 kada dolyar niadtong ika-23 sa Marso, tulo ka semana human direktang masalambigit ang Estados Unidos sa giyera.
Sa kasamtangan, nagpabilin ang bayloay sa palibot sa P60.23 hatud sa taas nga demand sa dolyar ug pagtaas sa presyo sa lana sa pangkalibutanong merkado.
Bisan paman sa pagkunhod sa kantidad sa piso, nagsilbi kining cushion o pangdepensa para sa mga pamilya sa mga Overseas Filipino Workers (OFW).
Tungod sa mas taas nga bayloay, midako ang kantidad sa mga remittance nga mitabang aron balansehon ang pangawas nga pondo sa nasud.
Nahimong mas kompetitibo usab ang mga serbisyong wala nagdepende sa mga giangkat nga materyales, partikular ang business process outsourcing ug tourism.
Bisan paman niini, nasinatian sa mga yanong katawhan ang negatibong epekto niini.
Ang mas hinay nga piso nagpataas sa kantidad sa mga import sama sa petrolyo, pagkaon, ug suplay sa kuryente.
Kini naghatud sa inflation ug direktang nagpakunhod sa purchasing power sa mga Pilipino.
Gitin-aw usab ni BSP Governor Eli Remolona nga sagad nanginlabot lang ang ahensya sa foreign exchange market kung dunay excessive volatility o grabeng kausaban sa merkado.
Apan gipaneguro niini nga andam moaksyon ang central bank ugaling mahimong disorderly na ang padayon nga paghinay sa piso.
