BUTUAN CITY – Gipaneguro sa Provincial Director sa Department of Trade and Industry kon DTI-Agusan Del Norte nga dunay igong suplay sa nag-unang palaliton ang probinsiya.
Sigon ni Provincial Director Jane Sacote nga base sa ilang sinemanang pagmonitor sa presyo sa mga basic goods, walay dapat ikabalaka sa suplay.
Gimonitor sa buhatan ang 102 ka mga dagkong tindahan sa Agusan Del Norte og 19 usab sa Butuan City.
Mihangyu nalang ang opisyal ngadto sa mga negosyante nga dili magpahimulos sa kasamtangang sitwasyon diin apektado kita sa nahitabong giyera sa Middle East.
Sumala pa niini nga magkulang lang ang suplay ugaling dunay mahitabong pagtago niini o bakaha dunay mag-panic buying.
Lakip sa gipahimangno sa opisyal nga dili magpataka og pasaka sa presyo sa ilang mga produkto dayung butyag nga nasabtan nila ang usbaw apan kinahanglang makatarunganon kini.
Gihimangnoan usab ang mga negosyante nga dapat musunod sa suggested retail price. Sa karun dunay duha ka produkto matud pa nga nagpasaka og presyo, ang Sardines og Beefloaf.
Sa mga kunsumidor, gi-awhag sa opisyal nga magbinantayon og dili mag-panic buying ug kung dunay makitang tindahan nga nakalapas sa lagda sa balaod ilabina sa presyo, ipaabot kini ngadto sa ilang buhatan aron ilang ma-aksiyonan.
Ugaling dunay makitang makalapas, ila kining padalhan og letter of inquiry diin ilang e-explain kung nganung nagpasaka sila og presyo apan kung dili sila satisfied sa tubag, ila kining isyuhan og showcause order.
Samtang makig-alayon usab sila sa lokal nga kagamhanan nga maoy mas makahatag og penalidad pinaagi sa pagkansela sa ilang business permit.
