BUTUAN CITY – Ma-isugong gihagit ni Senador Rodante Marcoleta si Senador Ping Lacson nga dili mutago bisan asa o dili maghatag og bisan unsa nga alibi, aron lang maluwas ang mga tag-as nga opisyal sa gobyerno nga gilambigit sa daghang mga whistleblowers nga maoy utok sa lapad nga kurapsyon sa kaban sa katawhan pinaagi sa mga flood control porjects.
Sa ilang subling panag-agbat atol sa regular session kagahapon, wala’y lipod-lipod nga gibirahan Marcoleta ang chairman sa Senate Blue Ribbon Committee kalabot sa daghan niining alibi aron lang dili mapatawag ang mga tawong gilambigit sa kaylap nga kurapsyon sa gobyerno sama ni kanhi House Speaker Martin Romualdez.
Gibalik-lantaw pa ni Marcoleta ang rason nga gihatag kaniadto ni Lacson nga tungod sa inter-parliamentary courtesy, dili sila makabuot kung dili mutunga sa hearing si Romualdez.
Dinhi na gipadayag ni Marcoleta nga sa kadako sa kwarta nga gikurakot gikan sa kaban sa gobyerno, kung siya ang nahimong chairman sa Senate Blue Ribbon Committee, iyang baliwalaon ang inter-parliamentary courtesy tungod ug alang sa kaayuhan sa kinabag-ang katawhan.
Wala’y natubag niini si Lacson sama sa una pa niyang gipadayag nga dili niya mahimong ipatawag sa committee hearing si Undersecreatary Adrian Bersamin isip resource person tungod kay wala kini nahisgutan sa minutes o transcipt sa ilang hearing.
Siya pa mismo ang mi-angkon nga iya kining nahisgutan atol sa interpelasyon sa Development Budget Coordination Committee kon DBCC kalabot sa mga tawong duna’y allocables sa mga anumalusong proyekto.
Dinhi na siya gisupo ni Marcoleta nga dapat siya mismo ang nagpatawag kang Bersamin tungod kay siya ang nag-highlight niini sa plenary debates sa 2026 budget kansa timaan nga importante kini nga isyu.
Gisundan pa kini sa pagsukmat ni Marcoleta sa mga gipangbulgar mismo ni Lacson ilabina ang kalabot sa duha ka mga tag-as nga opisyal nga nalambigit sa isyu apan wala niya gibulgar kansa timaan matud pa nga gilikayan ni Lacson aron dili mabutang sa transcript.
