BUTUAN CITY – Milapas na sa $100 matag bariles ang presyo sa krudo sa unang higayon sulod sa kapin tulo ug tunga ka tuig tungod sa epekto sa nagpadayon nga gubat sa Iran nga naka-apekto sa produksiyon ug pagpadala sa lana sa Middle East.
Ang kasamtangang presyo sa usa ka bariles sa Brent crude gigamit isip international standard, miabot sa $107.97 human mibalik ang market trading sa Chicago Mercantile Exchange.
Misaka kini og 16.5% sukad niadtong Biyernes, nga misira sa presyong $92.69 kondiin gila-uman nga musaka o moubos pa ang maong presyo samtang nagpadayon ang market trading.
Kahinumduman nga ang kataposang higayon nga milapas sa $100 matag bariles ang presyo sa krudo sa US nahitabo niadtong Hunyo 30, 2022, diin miabot kini sa $105.76, samtang ang Brent crude naman miabot sa $104 matag bariles niadtong Hulyo 29, 2022.
Sukad sa paglusad sa joint attack sa Iran sa Israel ug United States, na-apektuhan ang financial markets tungod sa pagsaka sa presyo sa lana kansa naghatag og kabalaka nga mosaka pa ang inflation tungod sa mas mahal nga energy costs ug posibleng mosangpot sa pagkunhod sa paggasto sa mga konsyumer sa United States, nga usa sa mga nagpalihok sa ekonomiya.
