BUTUAN CITY- Gimando ni Department of Agriculture (DA) Secretary Francisco Laurel Jr. ang mas hugot nga pagbantay sa presyo ug suplay sa bugas samtang nagpadayon ang kagubot sa Middle East.
Sumala ni DA Spokesperson Asec. Arnel De Mesa, sugod sunod semana mas paigtingon pa ang monitoring sa mga merkado ug bodega aron masiguro nga adunay igo nga suplay ug malikayan ang abuso sa presyo.
Sigon pa niini, nga mas kanunay na ang pag-suroy sa DA team ilabi na sa mga lugar nga taas ang konsumo. Sa pagkakaron, nagsugod na ang harvest season ug molungtad hangtod Abril, gani gilauman nga taas ang stock sa lokal nga bugas.
Ang imported rice gikan sa Vietnam, Cambodia, ug Myanmar nagpabiling barato ang transportasyon, hinuon dili lauman nga mosaka og dako ang presyo niini sa lokal nga merkado gawas lang sa freight cost nga posibleng makaapekto sa presyo sa bugas sa Pilipinas.
Gipunting usab sa DA nga ang bisan unsang pagtaas sa presyo kinahanglan nga proportional ug makatarunganon, ug kini pagabantayan sa umaabot nga mga adlaw.
