BUTUAN CITY – Determinado si kanhi Chief Presidential Legal Counsel Salvador Panelo nga mahimong kabahin sa defense team ni kanhi Pangulong Rodrigo Duterte sa gi-atubang niining kaso nga crimes against humanity sa International Criminal Court (ICC).
Gibarugan sa kanhi Duterte appointee nga gusto niyang makasulod sa panel aron makatabang sa pagdepensa sa kanhi presidente.
Mao usab kini ang hinungdan nga nag-apply siya og accreditation sa ICC pipila ka adlaw ang milabay.
Dugang pa sa batikang abogado, gusto usab niyang makabisita ug makig-istorya kang Duterte samtang kini anaa sa detention cell sa The Hague tungod sa kaso nga iyang gi-atubang.
Human sa iyang aplikasyon, gila-uman ni Atty. Panelo nga molungtad og walo ka bulan sa dili pa magpagawas ug desisyon ang ICC bahin sa iyang request.
Unang gisubmite sa iyang anak nga si Atty. Salvador Paolo Panelo Jr. ang aplikasyon, kauban ang tanang gikinahanglan nga dokumento.
