BUTUAN CITY- Gi-pasalig ni President Ferdinand Marcos Jr. ang mga negosyanteng Koreano nga padayon ang pagpatuman sa administrasyon sa dagkong reporma sa ekonomiya aron mas lig-on ang kumpiyansa sa mga mamumuhunan sa Pilipinas.
Sa iyang speech atol sa Philippines-Korea Business Forum, sigon sa Pangulo nga gikuha na sa gobyerno ang mga babag sa burukrasya, gipamenos ang gasto sa pagnegosyo, ug gipakusgan ang kapasidad sa nasod nga makigkompetensya sa global nga merkado.
Giila usab niini ang mga balaod sama sa CREATE MORE Act kansa naghatag og insentibo sa dagkong proyekto nga adunay puhunan nga dili moubos sa ₱50 bilyon o makahimo og 10,000 ka trabaho, ug ang Capital Markets Efficiency Promotion Act kansa nagpaubos sa stock transaction tax gikan 0.6% ngadto sa 0.1% aron mas episyente ang kapital nga merkado.
Dugang pa ni President Marcos Jr., giusab usab ang Foreign Investments Act ug Retail Trade Liberalization Act aron mas mapadali ang pagsulod sa mga dayuhang negosyo, samtang ipinatuman ang Executive Order No. 18 o Green Lanes for Strategic Investments aron mapaspas ang pag-apruba sa dagkong proyekto.
Gilauman sa Pangulo nga kini maghatag og mas lig-on ug makabuluhang relasyon sa kalakalan tali sa Pilipinas ug South Korea, ilabi na sa shipbuilding, nuclear energy, aerospace, electronics, ug biotechnology.
