BUTUAN CITY – Gi-dismiss sa Regional Trial Court (RTC) Branch 297 sa Pasay City ang petition for certiorari nga giduso sa contractor ug detainee nga si Pacifico F. Discaya II, nga nagpalig-on sa konstitusyonal nga kagahom sa Senado sa Pilipinas ug nag-validate sa contempt citation batok kaniya.
Sa desisyon nga gipagawas kaganina, Lunes Pebrero 23, klaro nga gibutyag sa korte nga wala mapakita ni Discaya nga adunay grave abuse of discretion ang Senado tungod kay gihatagan siya og hustong proseso.
Gipakita matud pa sa pagdungog nga si Senador Panfilo Lacson, Chairperson sa Blue Ribbon Committee, klaro nga mindful sa due process ug gipahimangnoan pa si Discaya nga magpasabot ngano nga dili siya dapat i-contempt.
Samtang sa testimonya ni Discaya. gibutyag ni Judge Ronald August Tan sa iyang desisyon nga sa Blue Ribbon proceedings, sa dihang gipangutana si Mr. Discaya bahin sa wala pag-apil sa iyang asawa, nakadawat ug nabasa na sa record ang sulat ni Mrs. Discaya nga naghatag og rason sa iyang wala pag-apil.
Apan ang sulat nag-ingon nga ang eksklusibo nga rason mao ang usa ka employee meeting, nga lahi sa giingon ni Mr. Discaya nga tungod sa medical condition rason sa inconsistency sa ilang mga pamahayag.
Gi-ila sa korte nga ang Committee on Accountability of Public Officers and Investigations (Blue Ribbon Committee) naglihok subay sa konstitusyonal ug legal nga mandato sa pag-conduct og legislative inquiry ug sa paggamit sa gahum nga mag-cite og contempt sa resource persons kung kinahanglan.
Ang mga respondents sa petisyon mao ang Senado sa Pilipinas, ang Blue Ribbon Committee, ang Chairperson Senator Panfilo Lacson, Senate President Vicente C. Sotto III, ug ang Senate Sergeant-at-Arms.
Nagpadayag ang Senado sa ilang lig-on nga commitment sa pagpanalipod sa rule of law ug sa pagrespeto sa judicial review isip usa ka vital safeguard aron mapreserbar ang balanse sa tulo ka sanga sa gobyerno.
