BUTUAN CITY – Gipa-ambit ni Kris Aquino nga aduna siya’y deep vein thrombosis (DVT), usa ka seryosong kondisyon nga hinungdan sa mga blood clots.
Bisan pa niini, nagpabiling positibo ang Queen of All Media ug naglaum nga magpadayon ang iyang pagkaayo.
Sa usa ka Instagram post kagahapon Pebrero 1, gibutyag ni Kris nga unom na ka semana siyang na-confine ug gilauman nga makapauli na sulod sa pipila ka mga adlaw.
Gipasabot niya nga dili pa siya tugotan sa pagbiyahe sakay sa eroplano hangtod dili pa mawala ang mga blood clots.
Kabahin sa iyang rehabilitasyon ang pag-ehersisyo ug paglangoy, busa nangayo siya og tabang sa publiko sa pagpangita og lugar nga adunay swimming pool nga duol sa mga ospital.
Gipakita usab ni Kris ang iyang pagpasalamat sa medical team nga mitutok sa iyang pagtambal ug gipaambit ang iyang kadasig alang sa iyang adlaw’ng natawhan karong Pebrero 14, nga iyang gitawag nga posibleng “rainbow year” human sa tanang mga pagsulay nga iyang naagian.
