BUTUAN CITY – Dismayado si Department of Public Works and Highways kon DPWH Secretary Vince Dizon human nasuta dihang personal niining gi-inspeksyon kagahapon nga wala pa mahuman ang Maasin ug Asinan bridges sa lungsod sa Pilar, Surigao Del Norte.
Kini tungod kay nasuta sa kalihim nga gi-report man kini nga nahuman na niadto pang tuig 2022 apan klaro nga wala pa, human kini gisugdan pagtrabaho niadtong tuig 2021.
Wala mapugngi sa kalihim ang iyang kasuko human na-inspeksyon ang maong mga proyekto tungod kay ang delay sa Maasin ug Asinan bridges, nagpasabot nga nagpabiling lisod ang transportasyon ug connectivity sa lungsod sa Pilar diha sa mga silingang barangay.
Gipadayag sa kalihim nga ang diskrepansiya tali sa gi-report ug sa aktwal nga nahuman, nagpakita og problema sa project monitoring ug accountability hinungdan nga maglusad na usab siya og imbestigasyon aron masuta kung ngano gideklara kining natapos na, taliwa nga layo pa kini sa tinuod nga report.
