BUTUAN CITY – Gitakda nang iproklama sa National Board of Canvassers pagpanguna sa Commission on Elections kon COMELEC unyang alas-tres sa hapon, ang mga mananaog sa party-list organizations sa 2025 midterm elections.
Sumala ni COMELEC chairman George Erwin Garcia, nakahukom sila nga wala’y himuong partial proclamation kung dili makumpleto ang listahan sa mga mananaog. Dugang pa niini nga mopagawas og resolusyon ang National Board of Canvassers kon NBOC sa proklamasyon sa mga mananaog nga party-list groups lakip na ang gidaghanon sa mga puwesto nga gitagana alang kanila.
Nasayrang dunay 63 ka mga lingkoranan nga gitagana alang sa party-list representatives apan gilantaw pa sa COMELEC ang legal nga mga remedyo sa mga gipangayo sa pipila ka mga grupo nga kinahanglag dugangan pa ang ilang lingkuranan sa Kongreso. Gibase ni Garcia ang party-list number sa formula nga gipagawas sa Korte Suprema sa hukom niini niadtung 2009.
Base sa National Certificates of Canvass (COC) nga gipagawas sa NBOC, nanguna ang AKBAYAN, sa mga party-list winners nga gisundan sa Duterte Youth, Tingog, 4Ps, ACT-CIS, Ako Bicol, Uswag Ilonggo, Solid North, Trabaho ug CIBAC.
