BUTUAN CITY – Gibarugan ni Senador Ronald Bato dela Rosa nga sayop ang gihimo sa administrasyong Marcos sa pagpa-aresto kang kanhi Pangulong Rodrigo Duterte tungod kay paglapas sa balaud ang gihimo sa administrasyon.
Gikan matud pa sa sinugdanan, sayop nang daan ang proseso sa administrasyon hangtud na sa pagpadala kaniya ngadto sa International Criminal Court kon ICC sa The Hague, Netherlands.
Sigon sa senador, kung sundon ang normal nga proseso, ang requesting party mao gayod ang musundo sa naarestong indibidwal apan ang gihimo sa gobyerno, mao pa kini ang naghatud sa kanhi pangulo ngadto sa ICC pinaagi sa gisakyan niining eroplano.
Madumdumang sa pagdungog kagahapon sa Senate Committee on Foreign Relations, gikwestyon ni Senador Alan Peter Cayetano ang paggamit sa sub judice rule ug executive privilege sa wala pagtambong sa mga nag-unang resource persons.
Gihimong pananglitan ni Cayetano si Criminal Investigation and Detection Group kon CIDG director Police Maj. Gen. Nicolas Torre III nga dili cover sa maong privilege, gawas na lang kung duna’y direktang mando ni Pangulong Bongbong Marcos.
Atol sa pagdugog sa Senate Committee on Foreign Relations kagahapon, gibutyag ni Senador Bato nga dili mahitabo ang pagpadakop sa kanhi pangulo sa mga kadagkuan sa otoridad kung wala ang mando ni Pangulong Bongbong Marcos nga wala na komentuhi pa ni committee chairman Senadora Imee Marcos.
