BUTUAN CITY – Hilabihan ang kakurat ug mibatig kahadlok ang usa ka lalaki sa Tanjay City, Negros Oriental sa dihang nakita niya ang hitsura sa usa ka baktin nga gihimugso sa iyang binuhing anay.
Base sa post diha sa social media ni AJ Bantaya Cardenas, walo ka baktin ang gihimugso sa iyang anay diin pang-upat ang dunay talagsaong itsura nga daw nawong sa tawo ug duna pay tingog nga murag tawo.
Sumala pa niini nga daw tingog sa bata ang iyang nadungog gikan sa maong baktin.
Dili kumpleto ang mga parte sa nawong sa baktin apan buhi kini sa dihang gihimugso. Normal usab ang hitsura sa uban pang baktin.
Human sa upat ka oras sa dihang kini gipakatawo, namatay ang baktin.
Apan dili kini ang unang higayon nga naghimugso og baktin na dunay talagsaong porma ang iyang baboy human sila nakabaktin usab nga daw dunay pako.
Sumala usab sa usa ka beterinaryo, posibleng premature ang baktin nga murag nawong sa tawo o kaha nakabaton og abnormality sa pagmabdos sa anay.
