BUTUAN CITY – Pursigido ang bana sa 38-anyos nga si alyas Milagros nga ipapriso kini uban sa gisugo niining si Avelino Lopez nga maoy naglabay sa sako nga unang gipasi-atab nga basura apan sulod diay niini ang usa ka bag-ong natawong bata nga patay nang nadiskubrehan sa mga tawo didto sa kasagbutang bahin sa minteryo sa Brgy. Poblacion, Bayugan City, Agusan del Sur kondiin bali na ang li-og.
Emosyunal nga gibutyag sa bana nga si alyas Loloy nga blind siya sa mga panghitabo ug natingala na lang siya nga midako ang tiyan sa iyang asawa taliwa nga siyam ka tuig na silang wala magdulog bisan og ipon sila og balay human mitagam nga na-caesarian kini sa pag-anak sa ilang ikaduhang bata.
Mas gikalagot ni Loloy nga siya pa ang gipasanginlan sa iyang asawa nga nagsugo matud pa kang Avelino nga ilabay ang sako taliwa nga kini matud pa ang nag-chat sa maong lalaki, tungod kay dili siya makamaong mugamit og cellphone. Hangtud karon, blangko pa ang bana kung kinsa ang nakaburos sa iyang asawa tungod kay ang gipalakat niini nga istorya kaniya, gibarang matud pa siya.
Ang iyang gikatingala kay niadtong gabii nga nanganak na diay kini, wala na kini mangabli sa kwarto ug nakadungog siya og kaduha nga uha sa bata hangtud nga pagsulod niya, gipalabay na ang sako apan wala gipa-abli sa iya sa rasong duna matud pa kini mga mananap nga gikan nanggawas sa iyang bilahan.
Nasayrang naka-hospital arrest karon ang iyang asawa human na-serve sa mga prosecutors didto sa Democrito O Plaza Memorial Hospital, sa Brgy. Patin-ay, lungsod sa Prosperidad, ang warrant of arrest samtang nabilanggo na ang naglabay sa sako nga duna’y sulod nga bata.
