BUTUAN CITY – Mi-abot na sa 24 ka mga tawo ang patay sa nagpadayong wildfires sa Los Angeles, California sa Estados Unidos kondiin sigon sa Los Angeles County coroner kon medical examiner, 8 sa mga namatay gikan sa lapad nga wildfire nga mi-ulbo sa Palisades samtang 16 usab ang gikan sa Eaton fire.
Gila-umang musaka pa ang maong ihap tungod sa padayon pang search, rescue and recovery operations ka-uban ang mga cadaver dogs sa mga lugar nga apektado sa wildfire ilabina nga duna’y 16 ang missing hinungdan sa pagmontar karon og center diin i-report ang mga nawala.
Gitambagan usab ni LA city Fire Chief Kristin Crowley ang mga residente nga dili una mubalik sa ilang mga nasunog nga balay partikular sa Palisades area tungod kay duna pa gihapon kini mga active fires ug delikado pa sa publiko.
Wala pa gihapo’y suplay sa kuryente ug tubig sa mga lugar nga nsunugan gawas nga nadamyos usab ang ilang mga gas lines ug wala’y stable nga istruktura.
Sa pagkakaron, anaa sa 150,000 na ka mga residente sa LA county ang nagpabiiling anaa sa evacuation orders.
Nag-isyu na usab ang National Weather Service og red flag warnings hangtud karong Miyerkules tungod sa grabeng fire conditions ilabina nga nasinatian gihapon ang sustained winds nga 80-KPH ug buylo nga mu-abot sa 113-KPH kondiin ang pinakadelikado matud pa, ugmang adlawa, Martes.
Sigon ni weather service meteorologist Rich Thompson, mas kusog ang buylo sa Santa Ana winds nga sobrang kaa-uga rason nga mas kritikal pa gihapon kaayo ang fire weather conditions.
